ULA LUPA!! PEMILIHEN SERAYAN GBKP RG. BATU AJI 2014-2019

Mari sigunaken hak pilihta

Lanai ndekahsa enggo ka seh paksana silakoken me pemilihen Pertua ras Diaken i belang-belang GBKP enda, bagepe i Runggun GBKP Batu Aji proses demi proses tahapen pemilihen enggo ilaksanaken mulai pemilihen bakal calon ibas sektor (PJJ) nari, seh me nangdangi proses pemilihen secara bersama ibas gereja sibakal ilaksanaken ibas Minggu, 06 April 2014 sireh. 

Bagi nggo sieteh, maka periodisasi pemilihen enda ilakoken ibas gerejanta 5 tahun sekali, alu sada  tujun maka lit min penyegaren ibas serayan e. Pertua ras Diaken eme serayan si ipilih Dibata erkelang-kelangken
perpulungenNa, merupaken pelayan khusus ibas gerejanta. Emaka ibas perdalinen (proses) si terjadi, man banta kerina perpulungen gelah ngasup kita ngergakenca. Ertina, secara sedar tah la sedar banci saja terjadi arah pengerana tah perbahanenta peturah proses e lanai meherga. Bagepe adi nggo terpilih sekalak temanta, tetaplah ras-ras kita ndukung pelayanenna.

 

Merincuh kita jadi serayanNa e merupaken hal si iarapken Tuhan. Tapi tentuna perlu si gejab, maka labo saja arah jadi Pertua ras Diaken maka banci kita ngelai i Peken Anggur Tuhan. Banci saja arah jadi anggota ngawan perpulungen pe kuh nge banci sibahan. Arah enda ateta ngataken, dikune kita merincuh tapi langa ka seh paksana kita terpilih jadi Pertua ras Diaken, la ka bo e erbahanca kita lanai tutus ku gereja, entah si paling bahaya sitadingken ka gerejanta ibas kita nuduhken rasa kecewa. Perlu kita megermet, maka lit paksana kita ipake Tuhan ras lit ka paksana nggo arus si tangtangi jabaten e. 

Pertua tah Diaken bali nge “kadarna“, labo siganjang teruken. Umpamana, tah lit pengakap maka ganjangen jabaten Pertua asa Diaken, emaka adi paksa genduari e ia  ngelai sebage Pertua, ibas pemilihen enda kari terpilih ia jadi sekalak Diaken, labo berarti “turun kelas“ atau  sebalikna, paksa gundari kita jadi Diaken, emaka ibas pemilihen enda terpilih jadi Pertua, labo berarti “ naik kelas“. Alu kata sideban ateta ningetken maka meherga ras meriah min siakap adi ibas jabaten siapai pe i percayaken Dibata man banta guna sidahiken.

Ibas proses pemilihen Pertua ras Diaken biasana ibahan lebe pencalonen ibas PJJ/sektor nari. Calon enda kelipaten dua asa iperluken ibas sektor, emaka lit nomor urut rikutken buena sorana ibas sektor e. Perlu sigejab maka nomor urut piga pe kita ibas calon e, e merupaken pilihen Dibata. Labo lit istilah “pendamping“ (si ndampingi), entah “guna ndemi saja“ (gelah nggo dem calon e). Sebab labo tertutup kemungkinen maka nomor urut si terakhir kita ibas pencalonen sektor nari, banci terpilih nge kita ibas pemilihen secara runggun. Alu kata sideban ateta ngataken maka, bicara sitik tah mbue soranta kerina nge e arus iergai.

Meriah kel ukurta adi perdalinen tah proses pemilihen Pertua ras Diaken periode 2014-2019 enda banci erdalin alu mehuli. Tentuna enda banci terjadi erkiteken kerina kita ngawan perpulungen ija pe kita ringan banci alu ras-ras ikut  ndukung ras mensukseskenca. Caranta guna  ndukung eme arah litna penggejaben maka meherga kel dahin enda, ras dahin enda eme dahin Dibata. Alu bage maka labo lit hakta selaku manusia guna nukang-nukangisa, tah encedakenca. Adi sukses ras erdalan alu mehuli, si terpilih pe meriah ukurna, si milih pe malem atena. Dibata pe ermulia.

Kirim Komentar