(Minggu Passion III, Reminiscere, inget min perkuah ate-Ndu o Tuhan)
Tema: “Kita rembak ras Dibata arah kinitekenta, labo pemetehta”
Introitus: Roma 1:17
Ogen: Roma 4:1-5; 13-17
Khotbah: Johanes 3:1-17
Ide Sentral Teks:
- Kalak si rembak ras Tuhan erkiteken kinitekenna, nggeluh me ia.
- Manusia iperembakken ras Dibata labo erkiteken gegeh, beluh ntahpe ndalanken undang-undang, tapi erkiteken kinitekenna ija Dibata jine kap si enggo ngerembankken diriNa man manusia.
- Kerehen Yesus Kristus ku doni enda eme lako nehken keselamaten man kerina kalak si tek man baNa janah Ia reh lako jadi Hakim man kerina isi doni enda emaka keselamaten e hanya lit ibas Yesus Kristus, Hakim si labo ngukum tapi si mereken keterkelinen.
I. Bena Kata
Perayaken geluh manusia eme kuga gelahna banci ndatken pemeteh, jabaten, kinibayaken, gelar termurmur ras sidebanna. Emaka lit kuan-kuan ngatakenca,“senang nggeluh ibas doni enda, mate pagi masuk surga ka“.
Sada pihak lit nge perpayona kai sijadi perayaken manusie enda. Tapi adi sigargari terdauhen, bias kin man manusia bicara idatsa gia kerina kai si jadi perayakenna ndai? Tentu lang! Ternyata lit si lebih penting si arus ibahan manusia eme kuga gelahna kegeluhenna, pendahinna, usahana, masa depanna tetap terjamin eme alu ngerembakken dirina ras Tuhan si nepa ia. Banci kin manusia ngerembakken dirina ras Tuhan bege-bage saja? Tentu lang! Sebab Dibata nge leben si ngerembakken diriNa man manusia, emaka irespons manusia ndai alu ngerembakken dirina ras Tuhan arah kinitekenna. Emaka pada hakikatna kerembakenta ras Tuhan labo erkiteken pemeteh, erta, jabatenta tapi arah kinitekenta.
II. Penjelasen
1. Pengajaren ras pelayanen Yesus mereken dampak simbelin man kerina kalak si langsung naksiken kai siibahanNa. Pengaruhna la hanya masyarakat biasa si mengalami kuasa mujizat Yesus (si sakit ipepalem, si pentang erpengidah, si cempang erdalan, si selueken setan ipulahi, si mate ipegeluh mulih, si ceda ate i apuli) tapi pe pe ngkenai sekalak tokoh agama yahudi si tergelar Nikodemus. Kuga sedekah enda kita merespons pengajaren Kata Dibata si ibegi, ioge, iidah alu matanta jine? Apakah lit dampakna man banta? Atau hanya biasa-biasa saja? La lit bedana.
2. Perjumpan siilakoken Nikodemus alu erbuni-buni, mbuka wawasen si mbaru man bana kerna kuga kin arusna sesekalak si igelari bangsa pilihen Dibata banci ngaloken kegeluhen sirasa lalap (kinirajan Dibata) si labo kepeken bias terjeng ndalanken undang-undang Musa bagepe undang-undang sidebanna. Tapi lit sipaling hakiki eme arus ipetubuh peduakaliken.
Kalak si tek enggo ipetubuh pedua-kaliken arah pendahin Kesah Sibadia tupung ngaloken tanda peridin si erbanca kita tek man baNa. Arah kinitekenta perlu si jaga statusta enda gelah banci sialoken geluh sirasa lalap. Emaka wawasen pemetehta kerna kata Dibata pe perlu sitambahi rusur gelah si tandai Tuhan alu payo.
3. Nikodemus si awalna meraguken kai siikataken Yesus e (la masuk akalna) dungna ngangkaisa ras ngaloken Yesus ibas geluhna. Ketedehen ate Nikodemus, guna nandai Yesus ras pengajarenNa mbereken hasil/buah man bana sebab Yesus njelasken makna "tubuh peduakaliken“e alu bahasa si banci iangkaina. Sadar ntah lang ibas geluhta mekatep nge kita naksiken perbahanen-perbahanen Tuhan simbelin si maun-maun erbanca kita kemamangen. Kalak si lalap metedeh atena nandai kuasa ras keleng ate Tuhan, tentu iangkaina nge kai kin erti setiap kejadin siialamina ibas geluhna.
4. Kerehen Yesus ku doni enda menembus batas-batas (bahasa, budaya, warna kulit, status soial rsd) si lit ibas manusia. Kalak si tek man Yesus, pasti terkelin, sebab enggo keri kal ialemi Dibata dosa-dosana; enggo ijadiken Dibata manusia jadi anak-anakNa. Doni enda lanai bo banci selamat adi la kin arah Yesus, janah keselamaten e labo lit ibas kai ras ise pe. KerehenNa guna nelamatken labo guna ngukum manusia, emaka tergantung kuga respons manusia ndai ngaloken kerehenNa. Keselamaten siialoken kita labo guna dirinta jine tapi pe guna kalak sideban. Malem ateta sebab Kristus enggo nelamatken kita. Tetaplah kita ernalem man baNa saja. Ula sidayaken kinitekenta e alu hal-hal doni. Kinitekenta erbanca kita rembak ras Tuhan dingen ngasup nulak sura-sura doni.
5. Temanta ngataken,“Kita rembak ras Dibata arah kinitekenta labo arah pemetehta“. Kata rembak ngataken maka lit hubungen si khusus, si saling mengenal dingen rusaha njaga hubungen gelah tetap mehuli. Sijadi penungkunen eme apakah kita masih menjaga hubungen kita ras Tuhan gelah tetap mehuli? Sijagalah hubungenta ras Tuhan gelah tetap mehuli. Ula sempat sicedaken ukurNa. Abraham arah ogenta enggo ncidahken buah kinitekenna alu matuhi kerina perentah Tuhan. Bageme pe kita si enggo iperembakken Tuhan ras diriNa, sicidahken ka ibas geluhta maka kita pe rembak ras Ia gelah tuhu-tuhu kita terkelin, bagi nina Introitusta.
III. Penutup
- Dibata enggo ngerembakken diriNa ras kita arah Yesus Kristus gelah manusia si perdosa banci terkelin.
- Sicidahken buah kinitekenta alu ngerembakken dirinta ras Tuhan si enggo milih kita. Sijaga lalap hubungenta ras Ia gelah tetap mehuli.
- Keselamaten ialoken kalak si tek man Yesus, janah e la hanya guna sada bangsa tertentu (dirinta saja) tapi guna kerina tinepaNa.
- Mari sipakeken pemetehta guna mbabai kita reh rembakna ras Tuhan labo reh dauhna. Metedeh ateta Tuhan arah katana si ioge, si begi ras si idah kita rusur.
- Kalak si rembak ras Tuhan meteh mehuli dingen ciga atena si la mehuli.
Kirim Komentar
