RENUNGAN NATAL, 25 DESEMBER 2013

Thema: "Dibata Ras kita"

Introitus: Matius 1:23b           

Ogen: Yesaya 7:10-17           

Khotbah: Matius 1:18-25

Ide Sentral Teks: 

1. Dibata ras Kita

2. Reh me pagi keselamaten amin gia lit ka nge reh kiniseran si mesangat.

3. Dibata Rembak ras Kita

 

Wari enda eme wari si istimewa man kerina tinepa Dibata ibas doni enda, erkiteken enda merupaken peringeten ketubuhen Juruselamat kerina tinepa Dibata. Jadi sada keriahen simbelin man banta kerina simegiken berita enda, erkiteken arah Kata Dibata si isehken sekali enda kerina kita ndatken semangat simbaru guna lebih semangat erkiteken lit ibas pengepkepen keleng ate Dibata. 

Dibata ibas keleng ateNa nelamatken manusia siperdosa, si lit ibas kiniseraan si mesangat. Sura sura Dibata maka kerina tinepaNa lit min ibas keriahen ras kecukupen (bdk Kej 3). Bagepe seh ibas peristiwa kegeluhen bangsa Israel masa pelayanen Nabi Yesaya.La ate Dibata bangsa enda peltep ibas pengarapen aminna gia harus ngenanami kiniseran erkiteken reh raja Babel guna ngkuasai bangsa enda. Si enda jadi erkiteken bangsa enda la ngasup nggeluh jadi kalak patuh ras benar iadep adepen Tuhan Dibata. 

Ibas keadaan susah ras la erpengarapen isehken maka reh me sada paksa Dibata lanai ndauh ibas bangsaNa nari. Erkiteken dosa manusia, bagepe erkiteken ia tinepa ibas abu taneh nari erbahanca maka seh kel dauhna manusia sirang ras Dibata. Asa diganna pe manusia labo banci metunggung ilebe lebe Dibata adi labo Dibata singerembakken diriNa man manusia. 

Man banta genduari isehken maka Tuhanta Yesus nggo tubuh, ras enda ertina Dibata lanai ndauh ibas kita nari. Yesus eme kap Immannuel si ertina Dibata ras kita. Kerina kita si tek ras ngaloken Yesus jadi Tuhan ras juruselamatta maka ibas kegeluhenna Dibata nggo rembak ras ia. Pengertin Dibata rembak ras kita erbahanca kita jadi erpengarapen ibas nggeluh. Kalak si lit ibas ia pengertin enda erbahanca ibas kegeluhenna lit ibas keriahen, tetap, malem ukur aminna uga gia kinata kegeluhenna.  Si lit ibas ia pengertin Immanuel erbahanca reh terangna tujun kegeluhenna. Lit ibas ia pengertin simbages kerna kesusahen, bagepe kiniseraan, la kai pe lit erbahanca peltep pengarapenna erkiteken igejapna Dibata ras ia. Man kalak si lit buaten nggeluhna, la ia meganjang ukur, lebih jegirna, tualna, erkiteken kerina si lit e rehna ibas Dibata nari.

Genduari enda melala kalak bayak, erpemeteh, erpangkat salih jadi pinangko (korupsi), salih jadi kalak percikcik kerna kegeluhen, ntah mbiar jadi kalak musil. Kalak si erkemalangen man Tuhan labo ipediat Dibata jadi kalak musil (bd Kej 3; 39; Ul 28; Mas 1; Mas 37;Joh 15). Kalak si tek man Dibata ipasu-pasu ras ijamin Dibata kegeluhenna, terus ku anak kempuna, bagepe enggo isikapken Dibata inganna i Surga. 

Adi ikataken "Dibata ras kita" maka enda ertina, lanai lit kuasa kai pe si banci erkuasa nandangi kegeluhenta. Begu Ganjang, kuasa kinigurun, kuasa kegelapen, Tuyul ras kerina si ikataken kalak erkuasa la ergegeh man kalak si ikepkep Dibata kegeluhenna. Sienda terbukti seh asa si gundari maka gelar Tuhanta Yesus tuhu encidahken maka Immanuel “Dibata ras kita” 

Sada keuntungen si mbelin man banta kerina tinepa Dibata, erkiteken wari enda itegasken mulihi maka ibas ketubuhen Tuhanta Yesus enda ertina Dibata ras Kita. Keberhasilen, kemenangen jadi sikerajangenta kerina.

 

Tetap Semangat erkiteken Dibata ras Kita.

Selamat Natal!!!!

 

Kirim Komentar

RENUNGEN MALAM NATAL, 24 DESEMBER 2013

Thema: “Kata E Enggo Jadi Manusia”
Introitus: Yohanes 1:14
Ogen:Heber 1:4-12
Khotbah: Yohanes 1:1-14

Ide Sentral Teks:  

1. Kristus m'peteruk bana jadi persembahan pengalemi dosa manusia.   

2. Yesus Raja si la ersibar kuasaNa.

Kai erti thema, “Kata e enggo jadi manusia?” Kata e, eme Yesus Anak Dibata asal kerina si nasa lit. Ia jadi manusia, ertina Ia si kin Raja i babo kerinana, meseri diriNa umpat ras manusia si ermasap-masap, si geluhna ersibar la lebih asangken dukut-dukut. Kai gunana Ia jadi manusia? Jadi persembahen penebus dosa nggancihken manusia. Ertina, kerina manusia arus nanggung sendiri dosana alu ngaloken ukumen yang setimpal, eme iukum rasalalap ibas ingan kiniseran, ate mesui i neraka. Kerina manusia enggo erdosa, sekalak pe la metunggung jadi persembahen nebusi dosa. La lit dalan pulah i bas ukumen e nari, seakatan arah keleng ate Dibata man doni enda, sinuruh anakNa si tonggal reh ku doni enda jadi persembahen pengalemi dosa. Uga ikataken Yesus korban pengalemi dosa? Eme arah kerina kecibal geluhNa i doni enda: pelayanenNa, kiniseranNa, kematenNa, kekekenNa, kenangkihenna ku surga.

Kai respons, uga pengalointa Kata, Raja, Anak Dibata si tonggal reh jadi penebus? Israel si kin kerajangenNa la ngaloken Ia. Umumna manusia la nandaisa ras la ngalokenca. Tapi si ngaloken Ia, ipekuanakNa jadi anak-anak Dibata. Jemaat enggo ipukanak (iadopsi) Dibata jadi anak-anakNa, emaka ngataken bujurlah antara lain:

        1. Jadilah kalak kristen si konsisten, la sung-sung 

     I bas Matius 2:9 kalak Yerusalem ersurak-surak ngaloken Yesus, tapi ibas matius 2:6-11 kalak si ersurak-surak e, salih nuntut gelah Yesus isalibken.

Lit kalak kristen la konsisten kekristenenna. Sanga kebaktian i gereja ipujina Dibata, tapi ibas pendahinna ras ibas ingan si deban icurnakenna Yesus

         2. Muas melehe-lah nandangi Kata Dibata

Rikutken petunjuk pakar kesehatan, arus minem air putih 2 liter tep-tep wari gelah sehat ras mencegah penyakit jantung. Bageme pe kalak kristen guna sehat rohani la banci lang secara teratur menyantap santapan rohani eme Firman Tuhan secara teratur ras ngelakokenca ibas kegeluhen si tep-tep wari.

Lit kalak kristen menyantap santapan rohani, sekali seminggu, sekali sebulan bahkan piga-piga kali ngenca setahun. 

         3.  Lebeken kinirajan Dibata 

     Bahan Yesus ermulia ibas geluhta i bas si kuterana pe. Subuk senang ntah aru ate, meriah ntah melungen, runtung ntah puntung, pokokna muliaken Yesus tanpa musim.

Banci jadi lit kita lebih ngelebeken dirinta alu mudiken Yesus. Tupung senang lupa diri, tupung mberat terpingko-pingko  erlebuhku Yesus

         4. Jadilah pengunjung kebaktin yang partisipatif

Iarapken kerina jemaat ibas kebaktin tutus min. Tupung kebaktin, piga kalak si ukurna bulat ngikuti kebaktin, ras piga kalak ka si dauh ukurna ras kai siiukurina la jelas. Saja, banci jadi lit jemaat si la je ukurna tupung kebaktin erdalan.

Respons pengataken bujur man pengorbanen Yesus e, tutus min ateta erkebaktin, berpartispasi alu pusuh bulat guna ndatken manfaat ibas ibadah e nari, gelah alu pertumbuhen rohani si bage, jemaat nalsali ku sekelewetna. Amin.

Kirim Komentar